Итоги "Урожай-2013"

Ороссолуода орто оскуолатыгар алтынньы ый 21 – 25 күннэригэр  сылын аайы ыытыллар, саамай күүтүүллэх тэрээһиммит «Хомуур - 2013» бырааһынньыга буолла. Нэдиэлэ саҕаланыаҕыттан, араас тэрээһиннэр ыытыллан бардылар, ол курдук бастакы күрэхпит «Саамай күөх кылаас» диэн элбэх сибэккилээх кылааһы талыы буолла, бу күрэх түмүгэр «Саамай күөх кылаас» аатын 8 кылаас, биология кабинета ылла.  Ол кэнниттэн алын сүһүөх оҕолоругар  «Тыыннаах дьиктилэр» диэн, сибэкки иһитин айылҕа матырыйаалыттан киэргэтии күрэҕэр, оҕолор дьүүллүүр сүбэни кэрэ көстүүлээх оҥоһуктарынан сөхтөрдүлэр. Салгыы 9-10 кылаас оҕолоругар «Толкуйдуубут, быһаарсабыт, талан эппиэттиибит» диэн дириэктэри производственнай  үлэҕэ  солбуйааччы Антонова В. Д. уонна дириэктэри иитэр үлэҕэ солбуйааччы Попова С. Е. брейн-ринг  ыыттылар, манна оҕолор сүрдээх көхтөөхтүк кытыннылар, нэһилиэкпит, оҕуруот үлэтин туһунан араас боппуруостарга сөптөөх хоруйдары биэрдилэр. Биир сүүрүүлээх-көтүүлээх күнүнэн,  агро түмсүү уонна физкультура учууталлара  «Оҕуруот устун күүлэй» диэн орто сүһүөх үөрэнээччилэригэр   күрэх ыытылынна,  үс хамаандаҕа арахсан  оҕолор көрдөөх-нардаах эстафеталарга, толкуй оонньууларыгар кытыннылар.

Оскуолабытыгар, нэһилиэкпитигэр олус туһалаах күрэҕинэн «Чиэһи, хайҕалы үлэнэн!» диэн көрдүүр, үөрэтэр, чинчийэр  үлэ ыытылынна, манна хас биирдии кылаас биһиги нэһилиэкпит киэн туттар агрономнарын  туһунан ахтыы хомуйаннар, үөрэтэннэр,  дьүүллүүр сүбэ иннигэр  үлэлэрин көмүскээтилэр. Көрүдүөр устун тэлгэтиллибит дьиктилээхэй оҕолор хомуйбут оҕуруот астарын  нэдиэлэ устата оскуола бары үлэһиттэрэ, үөрэнээччилэрэ, ыалдьыттара сэргии көрдүлэр. Алтынньы 25 күнүгэр «Хомуур - 2013» бырааһынньыгын түмүктүүр биэчэр буолла. Бу күн дириэктэрбит Никифоров Н. Л. эҕэрдэ тылыттан саҕаланна. Ол кэнниттэн сайын устата үлэлээбит-хамнаабыт оҕолорго бириэмийэ, сэмэй бэлэхтэр туттарылыннылар. Алын уонна орто кылаас  оҕолоругар «Мин сиэдэрэй сэлээппэм» диэн куонкурус буолла, көрөргө сүрдээх кыраһыабай оҥоһуктарын оҕолор кэтэн киирэн көрөөччүлэри сөхтөрдүлэр. 1-11 кылаас оҕолорун «Үлэ киһини аатырдар!» диэн  буклеттара быыстапка  буолан туруорулунна, манна кылаастар араас кэмҥэ үлэлии сылдьан түспүт хаартыскаларын мунньан буклет оҥорон кылаастар икки ардыларыгар күрэхтэстилэр. Саамай улахан, сылын аайы ыытыллар « Дьикти бүлүүдэ» күрэҕэ буолла, бу сылга «Сахам сирин кыһыл кинигэтигэр киирбит кыыллара, үүнэйилэрэ» диэн тиэмэҕэ кылаастар оҕуруот астарыттан бүлүүдэ астаатылар уонна дьикти бүлүүдэлэрин,  мустубут ыалдьыттар иннилэригэр таһааран  көрдөрдүлэр.

Бу күн түмүгэр, кыайыылаах кыласстар  грамоталарынан, бэлэхтэринэн наҕараадаланан үөрдүлэр-көттүлэр. Онон саамай кэтэһиилээх, үөрүүлээх, биир сыл оскуоланан  муспут үлэбит түмүктүүр нэдиэлэтэ  олус таһаарыылаахтык ыытылынна, кэлэр сылга үлэлииргэ өссө да күүһү-уоҕу эптэ.

Суруйда: Саина Григорьева

9 кылаас үөрэнээччитэ.