“Ийэ тыл күнэ”
Олунньу 13 күнэ хас биирдии сахалыы саҥалаах киһиэхэ ураты суолталаах күн буолар, ол курдук бу күн биһиги “Ийэ тыл, сурук-бичик күнүн” бэлиэтиибит. Хас биирдии оскуолаҕа, уһуйааҥҥа оҕолор бу күн төрөөбүт тылларын туһунан араас дьиктини, саҥаны билэллэр, саха буолалларынан киэн туттар күннэрэ буолар.
Ороссолуода орто оскуолатыгар эмиэ бу күн ураты тыыннаах ааста. Сарсыардаттан оҕолор, үлэһиттэр сахалыы сайбаччы таҥнан кэлэн үөрэннилэр, үлэлээтилэр. Сахалыы таҥаспытын, оҕуруо бастыҥабытын кэтэ сылдьан санаалыын сырдаан, үлэлиир, үөрэнэр эмиэ өрө көтөҕүллүүлээхтик ааһара чахчы.
Ол курдук, олунньу 13 күнүгэр биһиги оскуолабытыгар кылааһынан сахалыы хоһоон ааҕыытыгар видео-конкурс, бастыҥ сахалыы таҥаска уонна оһуохай этиитигэр кылааһынан күрэхтэр ыытылыннылар. Оҕолор бары түһүмэх аайы үчүгэй бэлэмнээхтэрин көрдөрдүлэр, оһуохайдаан астынан – дуоһуйан тарҕастылар.