Үрдүк чыпчааллары дабай, эн, выпускник!

Ыам ыйын 23 күнүгэр Ороссолуода орто оскуолатыгар "Бүтэһик чуораан" үөрүүлээх бырааһынньыга ыытылынна.

2018 сылга Ороссолуода орто оскуолатын 7 оҕо бүтэрэр. Быйылгы сыл выпускниктара  оскуола олоҕор көхтөөхтүк кыттар, араас тэрээһиннэри бэйэлэрэ тэрийэн ыытар, оскуолаҕа бэйэни салайыныы оҕолор түмсүүлэрин хас да сыл иилээн-саҕалаан илдьэ сылдьыбыт үөрэнээччилэр буолаллар. Кинилэр истэригэр туйгун үөрэнээччилэр, бастын спортсменнар, общественниктар бааллар. Иллээх-эйэлээх кылаас  салайааччытынан нуучча тылын учуутала Стручкова Валентина Афанасьевна буолар.

 

Филиппов Никита 11 кылаас

Мин Филиппов Никита Сергеевич 2000 сыллаахха Ороссолуода нэһилиэгэр төрөөбүтүм. 2007 сыллаахха оскуолаҕа үөрэнэ киирбитим. Үөрэхпэр ортобун, араас ситиһиилэрдээхпин, куруһуоктарга улаханнык сылдьыбатаҕым, кылааһым оҕолорун кытта кэпсэтэрбин, оонньуурбун ордорор этим.

Билигин ЕГЭ туттараары экзаменнаах предметтарбар күүскэ бэлэмнэнэ сылдьабын.

Үөрэммит оскуолабар, учууталларбар махтанабын, иитэн-үөрэтэн таһаарбыттарыгар. Улахан Махтал!

 

Федорова Уйгууна  11 кылаас

Мин Федорова Уйгууна Ивановна 2007 сыллаахха Ороссолуода орто оскуолатын боруогар үктэммитим. Бастакы учууталым Никифорова Надежда Николаевна этэ. Кини олус эйэҕэс, хас биирдии оҕоҕо туспа сыһыаннаах, биһигини олус өйдүүр этэ. Надежда Николаевна уруоктарын олус интэриэһинэйдик ыытара, тиэмэлэрин сөптөөхтүк быһаарара. Биһиги кылааспытын хас да учуутал илдьэ сыдьыбыта. Надежда Николаевна, Ая Прокопьевна, Виталий Иванович уонна билигин кылааспыт салайааччыта Валентина Афанасьевна.

Ая Прокопьевна орто сүһүөххэ бастакы кылаас салайааччыбыт буолар, онтон Виталий Иванович иилээн биһигини илдьэ сылдьыбыта. Орто сүһүөххэ үөрэнэр кэмнэрбит олус түргэнник, бэһиэлэйдик ааспыттара. Оскуолаҕа үөрэнэр бүтэһик сылларбыт  Валентина Афанасьевнаны кытта аастылар. Учууталбыт тылын төһө да истибэтэрбит, кини ийэлии эйэҕэс сыһыана туохтааҕар да күндү, биһигини үс сыл иһигэр тулуйан, биир тыл булан илдьэ сылдьар.

Түмүкпэр этиэхпин баҕарабын, оскуолабыт үүнэ-сайда турдун. Араас нэһилиэктэртэн оҕолор кэлэн үөрэнниннэр, оскуолабыт барахсан сайдан ис.

 

 

 

Черноградская Надя 11 кылаас

Мин Черноградская Надя Ороссолуода орто оскуолатын бүтэрээри олоробун. Оскуола миэхэ элбэх доҕоттору бэлэхтээтэ. Учууталларым үөрэх-билии биэрэн 11 кылааска дылы араас ситиһиилэрдээх үөрэнэн кэллим.

 

Оскуолаҕа үөрэнэ сылдьар оҕолорго баҕарыам этэ, кыра кылаастан кыһаллан үөрэнэргитигэр, эрдэттэн баҕарар идэҕитин талынаргыт ордук буолуо дии саныыбын. Оскуолабыт күн аайы сайда турдун, элбэх оҕо үөрэнэ кэллин. Бу сыллар устата үөрэппит учууталларбар улаханнык махтанабын.

 

 

Степанова Аня 11 кылаас

Мин Ороссолуода орто оскуолатын бүтэрээри олороммун, үөрэммит оскуолабар баҕарыам этэ, өссө да сайда-тупса турарыгар. Элбэх күрэхтэргэ кыттан куруутун бастакы миэстэлэргэ сылдьарыгар. Оҕолору сырдыкка-кэрэҕэ угуйа турарыгар.

Оҕолорго баҕарыам этэ, үөрэхтэригэр кыһаллан туран үөрэнэллэригэр. Туохха барытыгар инники, бастакы буолалларыгар.

Оскуолабыт аатын ааттата, үрдүккэ, сырдыкка тардыһа туруохпут!

 

 

Трофимова Сардаана 11 кылаас

            Мин аатым Трофимова Сардаана Ороссолуода орто оскуолатыгар маҥнайгы кылаастан үөрэнэбин. Биһиги бастакы учууталбыт Надежда Николаевна. Мин 6 кылааска уруһуй кылааһын бүтэрбитим, онно уһуйан үөрэппит учууталым Надежда Григорьевна.

Оскуолам элбэх доҕоттору, умнуллубат түгэннэри бэлэхтээтэ. Биир өйдөнөн хаалбыт кэмим 2012 сыллаахха оскуолабыт саҥа дьиэҕэ киириитэ буолар. Онтон ыла сабыс-саҥа, сып-сырдык кылаастарга үөрэннибит.

Билигин экзамеммытын үчүгэйдик туттараары бэлэмнэнэ сылдьабыт. Оскуолабытын бүтэрэрбит бу кэллэ...

Сергеев Петя 11 кылаас

Мин аатым Сергеев Петя. Мин 11 кылааска үөрэнэбин. Ороссолуода орто оскуолатыгар 1 кылаастан, ол эбэтэр 2007 сыллаахтан үөрэнэ сылдьабын. Алын кылаастарга уонна 5 кылааска аллараа, эргэ оскуолаҕа үөрэммиппит. Онтон 6 кылааска саҥа оскуолаҕа киирбиппит.

6 кылаастан спортка сыстыбытым. Бастаан Филиппов Петр Михайлович салайыытынан сүүрүүнэн дьарыктаммытым. 7 кылааска үөрэнэ сырыттахпына Бочкарев Павел Николаевич саҥа үлэлии кэлбитэ уонна мас-тардыһыыга дьарыктаан саҕалаабыта. Бастакы сылларга улахан ситиһии суоҕа, онтон 9 кылааска үөрэнэ сылдьан “Дети Азии” 2 отборочнайын ааһан, экзаменнарбын этэннэ туттартаан норуоттар икки ардыларынааҕы “Дети Азии” оонньууларга кыттан үһүс миэстэ буолбутум, бу ситиһиилэрбиттэн биир бастыҥ ситиһиим буолар.

Оскуолаҕа үөрэнэр сылларым элбэх доҕор-атас ортотугар ааста.

 

Игнатьев Эдгар 11 кылаас

Мин аатым Игнатьев Эдгар. Оскуолаҕа үөрэнэр сылларбар  спорт араас көрүҥүнэн сөбүлээн дьарыктанным. Ол курдук, 2-6 кылаастарга Владимиров А.П. салайыытынан тенниһинэн дьарыктаммытым. 7 кылаастан оскуоланы бүтэриэхпэр диэри Бочкарев П.Н. салайыытынан мас-тардыһыытынан дьарыктанан кэллим. Ону таһынан, кыра эрдэхпиттэн Игнатьева М.И. салайыытынан научнай-исследовательскай үлэнэн дьарыктанаммын араас таһымнаах конференцияларга кыттаммын ситиһиилэрдээхпин.

Оскуолаҕа үөрэнэр сылларбар спортка, научнай үлэнэн дьарыктанан конференцияларга  кыттаммын олус элбэх кыайыылардаахпын, ситиһиилэрдээхпин. Бу кыайыыларым миэхэ инники олохпор туһалыа диэн эрэнэбин.

Үөрэнэн, үүнэн тахсыбыт оскуолабар баҕарыам этэ, күнтэн-күн үүнэ-сайда турдун! Элбэх ыччаттары иитэн-үөрэтэн таһаара турдун!