“Төрөппүт уонна дьиэ кэргэн”

         Сэтинньи 14-19 күннэригэр Ороссолуода орто оскуолатыгар “Төрөппүт уонна дьиэ кэргэн” нэдиэлэтэ буолан ааста, нэдиэлэни оскуолабыт социальнай – педагога Степанова А.С. уонна “Ситим” төрөппүт түмсүүтэ ыыттылар. Бу нэдиэлэҕэ төрөппүттэр аһаҕас уруоктарга сырыттылар, “Эбээлээх, эһээлээх буоламмын” диэн кылаас чаастарыгар кэлэн кыттыыны ыллылар, ону таһынан, “Оһуор утум” куруһуок салайааччыта Федорова Н.Г. ыыппыт маастар-кылааһыгар иискэ кэлэн үөрэннилэр.  Үөрэнээччилэргэ саамай интэриэһинэй күрэҕинэн “Бичиэнньэ күнэ” буолла, оҕолор төрөппүттэрин кытта минньигэс, саамай улахан, оригинальнай бичиэнньэлэрин астаан аҕалан быыстапкаҕа уурдулар  уонна  учууталларыгар, дьүүллүүр сүбэҕэ амсаттылар.

         Бу нэдиэлэ оҕолор уонна төрөппүттэр бииргэ алтыһалларыгар олус сөптөөх тэрээһиннэр ыытылыннылар. Ол курдук, литературнай көрсүһүү “”Саамай ааҕар кылаас”,  “Ийэм, аҕам уонна мин” диэн алын кылаас үөрэнээччилэригэр спортивнай күрэх ыытылынна, манна бастакы миэстэни 4 кылаастан Сергеевтар дьиэ кэргэн, иккис миэстэни 3 кылаастан Трофимовтар дьиэ кэргэн, үһүс миэстэни 2 кылаастан Львовтар дьиэ кэргэн ылан үөрэн – көтөн тарҕастылар. Ону таһынан, уол оҕону  аҕатыгар сыһыарар сыаллаах   “Байанай күрэҕэр” уолаттар аҕаларын кытта кэлэн кытыннылар. Нэдиэлэни түмүктүүр тэрээһининэн дьиэ кэргэн проектарын көрүү буолла манна үөрэнээччилэр ийэлэрин, эбээлэрин  кытта кэлэннэр араас тиэмэлээх проектарын көмүскээтилэр.

Бу курдук, дьиэ кэргэҥҥэ анаммыт нэдиэлэ олус элбэх иитиигэ аналлаах тэрээһиннэрэ, төрөппүт уонна оҕо сыһыаннара түпсарыгар, бэйэ-бэйэлэрин өйдөһөллөрүгэр элбэх үөрэҕи ыытта.

Суруйда: Анастасия Бочкарева