“Тэтим” үҥкүү бөлөҕө

Ороссолуода орто оскуолатыгар быйылгы сылтан үҥкүү куруһуогун салайааччытынан эдэр педагог Горохова Е.В. үлэлии сылдьар. Улахан бөлөх уонна кыра бөлөх оҕолорун мунньан “Тэтим” үҥкүү бөлөхтөрүн  тэрийэн араас таһымнаах  куонкурустарга ситиһиилээхтик кытыннылар.

Ол курдук, “Тэтим” үҥкүү бөлөҕүн бастакы улахан ситиһиилэринэн дойдулар икки ардыларынааҕы “Алтын Майдан - Якутия” – “Көмүс түһүлгэ” бэстибээл-куонкуруска кыттан “Уһуктуу” уонна “Дьөһөгөй” стилизованнай сахалыы  үҥкүүлэринэн  III истиэпэннээх лауреат үрдүк аатын ылан кэллилэр. Онтон соҕотохтуу үҥкүүгэ 7 кылаас үөрэнээччитэ Саша Захаров   “Дьөһөгөй тэтиминэн” уонна  “Ыйдаҥа” эмиэ стилизованнай сахалыы үҥкүүтүнэн  I истиэпэннээх дипломунан наҕараадаланна. 

Бу курдук, үрдүк ситиһиилээх “Тэтим” үҥкүү  бөлөҕө салҕыы  Крымҥа ыытыллар дойдулар икки ардыларынааҕы үҥкүү күрэҕэр ыҥырылыннылар.