Бүтэһик чуораан - 2017

Бу сыл Ороссолуода орто оскуолатын биэс бастыҥ үөрэхтээх, спортсмен оҕолор оскуола боруогун атыллаан тахсаллар. Ол курдук, кыһыл көмүс мэдээлгэ үөрэнэр Соловьева Саша, мас тардыһыыга республика хас да төгүллээх чемпиона Петров Ваня, остуол тенниһигэр улуус, республика чемпиона Антонов Саша, араас таһымнаах научнай-практическай конференция кыайыылаахтара Афанасьев Игорь, Ушницкай Рома.

Бүтэһик чуораан бырааһынньыгар оҕолор төрөппүттэрэ, аймах-билэ дьонноро, нэһилиэк бары тэрилтэлэрин  үлэһиттэрэ муһуннулар. Ороссолуода нэһилиэгин Аҕа баһылыга Макаров И.В., оскуолабыт дириэктэрэ Никифоров Н.Л., культура киинин дириэктэрэ Афанасьев И.В., ЖКХ начальнига Мохначевскай Н.М., оскуола профсоюһун бэрэссэдээтэлэ Филиппов П.М., дириэктэри иитэр, үөрэтэр үлэҕэ солбуйааччы Константинова А.Н., мас-тардыһыы тренера Бочкарев П.Н. тахсан оҕолорго эҕэрдэ тылларын эттилэр уонна наҕараадаларын туттардылар.

Бу күн оҕолору кылаас салайааччылара Петрова А.И уонна Антонова Е.В. бүтэһик кылаас чааһын ыыттылар.