Экология нэдиэлэтэ

Тохсунньу 16-21 күннэригэр Ороссолуода орто оскуолатыгар 2017 – экология  сылын көрсө, “экология нэдиэлэтэ” ыытылынна. Нэдиэлэни биология, химия учуутала Антонова Е.В. уонна агро цикл үлэһиттэрэ Антонова В.Д., Игнатьева М.И., Степанова Т.М.  тэрийэн ыыттылар.

Нэдиэлэ “Экология” уруогуттан саҕаланна, манна учууталлар үөрэнээччилэригэр айылҕа харыстабылын, Россияҕа экология сылын, агрооскуола үөрэнээччитэ айылҕаҕа чугас киһи буолан тахсарын туһанан араас элбэх тиэмэлээх уруоктары ыыттылар.

Саамай үөрэнээччилэргэ, үлэһиттэргэ өйдөнөн хаалбыт түһүмэҕинэн “Мин дойдум ытык сирдэрэ” диэн презентация хомуйан, оҥорон көмүскээһинэ буолла. Үөрэнээччилэр учууталларын, төрөппүттэрин кытта Ороссолуода хаһан даҕаны үөрэтиллибэтэх, ахтыллыбатах кэрэ муннуктарын биллилэр-көрдүлэр, дьүүллүүр сүбэ иннигэр тахсан көмүскээтилэр. Хас биирдии кылаас оҕото бу курдук  тэрээһиннэргэ  актыыбынай кыттыыны ыллылар,  “Үчүгэйи оҥорон, айылҕабытын харыстыыбыт”, “Экологическай ыллык” - квест оонньуу, НПК- “Туһата суохтан, туһалааҕы”.

Ону таһынан,  биир олус туһалаах тэрээһининэн “Нэһилиэк экологическай проблемалара” диэн ток-шоу ыытылынна, манна нэһилиэк тэрилтэлэрэ, библиотека,  администрация, медицинскэй пуун үлэһиттэрэ кыттыыны ыллылар, үөрэнээччилэр бары олус интэриэһиргээн барытын иһиттилэр, кыттыыны ыллылар.

Тэрээһиннэргэ кыттыбыт кылаастар, үөрэнээччилэр бары грамоталарынан наҕараадаланнылар. Инникитин үлэлэспит үлэлэрин, тохтоппокко, кэҥэтэн иһэллэригэр сыал-сорук туруоруннулар.

Суруйда:   Бочкарева А.А.