Ф.К. Попов 96 сылыгар аналлаах нэдиэлэ

Сахалартан бастакы Советскай Союз геройугар Ф.К. Поповка аналлаах нэдиэлэ Ороссолуода орто оскуолатыгар ахсынньы ый саҕатыгар ыытылынна. Нэдиэлэ устата викториналар, конкурстар, кылаас чаастара, көрсүһүүлэр буоллулар.

 Биһиги оскуолабыт 9 кылааһын үөрэнээччитэ Трофимов Алик Мэҥэ-Хаҥалас улууһун патриотическай экспедициятыгар Белоруссия сиригэр -уотугар араас историческай миэстэлэрин көрөн-истэн, билиитин хаҥатан кэллэ уонна  нэдиэлэ устата оскуолатын үөрэнээччилэригэр, учууталларыгар экспедиция туһунан кэпсээтэ, араас интэриэһинэй хаартыскаларын көрдөрөн оҕолорго умнуллубат түгэни бэлэхтээтэ. 

Нэдиэлэ оскуолабыт оҕолоро кыттыылаах үөрүүлээх тэрээһининэн түмүктэннэ. Бу тэрээһиҥҥэ, оскуолабыт интернатын оҕолоро туруорбут Ф.К. Попов  сэриигэ барыытын туһунан инценировка көрдөрдүлэр, алын кылаас оҕолоро хоһоон ааҕан көрөөччүлэр биһирэбиллэрин ыллылар.