Ийэ тыл күнүн көрсө

Оҕо кыра эрдэҕиттэн сахалыы төрөөбүт тылынан ыраастык саҥарарын ситиһээри, ситимнээх саҥатыгар болҕомто ууран Ороссолуода орто оскуолатын алын кылаас учууталларын түмсүүтэ олунньу ый саҕатыгар ийэ тыл күнүгэр аналлаах нэдиэлэ тэрийдилэр.

Нэдиэлэ устата алын кылаас үөрэнээччилэрэ сахалыы араас оонньуулары толкуйдаан,  оҥорон кэлэннэр табаарыстарын оонньоттулар. Хас сынньалаҥ аайы оҕолор толкуйдатар, сөптөөхтүк саҥарарга үөрэтэр оонньууларынан  бириэмэлэрин туһалаахтык атаардылар.

 Ини-бии Семен, Софрон Даниловтар үбүлүөйдээх сылларынан учууталлар истиэндэ, кыра оҕолорго аналлаах айымньыларын ыйааннар оҕолор болҕомтолорун тартылар. Оҕолор ааҕа сылдьар айымньыларын уруһуйга түһэрэн аҕаланнар көрүдүөргэ быыстапка оҥорон ыйаатылар.

Төрөппүттэргэ анаан “Саха тылын төһө билэҕин?” диэн биктэриинэ ыытылынна, төрөппүттэр сорудахтаах илиистэргэ сөптөөх эппиэти толорон аҕаллылар, кыайыылаахтарынан: 2 кылаас төрөппүттэриттэн Антонова В.К., Антонова Е.К., Федорова Т.И., 3 кылаастарга Трофимова Н.Б., 4 кылаастарга Ильина С.Т. таҕыстылар, грамоталарынан наҕараадаланнылар.

“Саха тылын дэгиттэр билээччи” диэн саха тылын уруогар бастыҥтан-бастыҥ үөрэнээччини талар күрэх ыытылынна, манна кылаастартан биирдии бастыҥ ийэ тылын  билээччини, сахатын тылынан сөпкө туттар оҕо бэлиэтэннэ ол курдук, Афанасьева Аня (2 кыл.), Попова Нарыйа (3 кыл.), Матвеева Таня (4 кыл.) саха тылын дэгиттэр билээччилэринэн буоллулар.

Түмүктүүр күҥҥэ, “Мин Сахабын” диэн төрөппүттэр оҕолор кыттыылаах ТОК оонньуу, сахалыы ас күрэҕэ,  хоһоон ааҕыыта, кыайыылаахтары наҕараадалыыр тэрээһин ыытылынна. Бу күн бары бэлэмнэнэн кэлэннэр сахалыы ас туһунан төһө билэллэрин кэпсээтилэр, дьүүллүүр сүбэҕэ амтаннаах астарыттан амсаттылар, төрөппүттэр хамаандаларга арахсан толкуйдаа, оонньоо, кыай күрэҕэр бэйэлэрин билиилэрин көрдөрдүлэр.

Бу курдук, алын кылаас үөрэнээччилэрэ кыра эрдэхтэриттэн сахалыы саҥаны өрө тутан, төрөөбүт тылларынан сөпкө тутталларыгар олук ууран учууталлара олус интэриэһинэй, туһалаах нэдиэлэни тэрийдилэр.