Ийэ тыл уонна сурук – бичик нэдиэлэтэ

Ороссолуода орто оскуолатыгар  олунньу 13-17 күннэрэ ийэ тылга уонна сахалыы сурукка - бичиккэ ананнылар.

Быйылгы ийэ тыл күнэ С.А. Новгородовка аналлаах кылаас чаастарынан саҕаланна, хас биирдии кылааска үөрэнээччилэр  төрөөбүт төрүт тылларын  таптыы, төрөөбүт тылынан саҥарартан кэрэ туох да суоҕун биллилэр.  Бу күн өссө биир ураты тэрээһининэн Лука Турнин 100 сылыгар аналлаах күргүөмүнэн хомустааһын буолла, учууталлар, үөрэнээччилэр бары бииргэ түмсэн оһуохай таһаардылар.

Нэдиэлэ устата үбүлүөйдээх суруйааччыларбытыгар аналлаах дьиэ кэргэн биктэриинэтэ, суруйааччылар олохторун, айар үлэлэрин билиһиннэрэр араадьыйанан иһитиннэриилэр, саха тылын уонна  литературатын, төрүт культура учууталларын аһаҕас уруоктара, учууталларга үбүлүөйдээх суруйааччыларга аналлаах дьыктаан ону таһынан,  биир күн үөрэнээччилэр сахалыы аһынан аһаатылар. Нэһилиэк библиотекаря Апросимова А.Е. кэлэн орто сүһүөх үөрэнээччилэригэр Алампаҕа аналлаах библиотечнай уруок ыытта, манна Алампа ырыа буолбут хоһоонун Алексеева В.М. ыллаан иһитиннэрбитэ ураты көстүү буолла.

Алын кылаас кыргыттарыгар, “Саха маанылаах аһа алаадьы” диэн алаадьы астыырга үөрэтэр маастар кылаас ыытылынна. Аныгы олох ирдэбилинэн интэриэһинэй, араас оҕуруот аһа буккуллубут тиэстэлэриттэн кыргыттар алаадьы буһаран таһаардылар, учууталларын, табаарыстарын күндүлээтилэр.

Нэдиэлэни түмүктүүр тэрээһининэн “Даниловскай ааҕыылар”  буоллулар. Хас биирдии кылаас Семен Данилов хоһооннорун хоһоонноохтук ааҕан, ырыа буолбут хоһооннорун ыллаан, туттардыын – хаптардыын уларыйан  тэрээһини өссө киэргэттилэр.

Бу курдук, сылын аайы ыытыллар тэрээһин, сыл аайы тупсан, саҥаттан саҥа сонун куонкурустардаах  буолара олус үчүгэй.