Михаил Андреевич Алексеевка аналлаах физика уруога

Бүгүн муус устар 5 күнүгэр Саха Сиригэр физико-математическай  оскуолалар хамсааһыннарын саҕалаабыт тэрийээччи, норуодунай учуутал Алексеев Михаил Андреевич үбүлүөйдээх 100 сааһа.

 Бу бырааһынньыгынан сибээстээн бүтүн Өрөспүүбүлүкэ үрдүнэн физикаҕа аһагас уруоктар ыытылыннылар.

Ороссолуода орто оскуолатын  физика учуутала Иванова Анна Архиповна 8 кылаастарга  «Оҕуруот  аһыттан уонна фруктаттан уот ылыахха сөп» диэн ааттаах аһаҕас уруок көрдөрдө. Бу уруокка оҕолор икки бөлөххө арахсан үлэлээтилэр. Бастакы бөлөх хамандыыра Местников Айсен, кинилэргэ фруктаттан уот ыларга үлэлээтилэр. Иккис бөлөх хамандыыра Трофимов Альберт – оҕуруот аһыттан уот ыларга үлэлээтилэр. Оҕолор уруокка  үөрэппит физика сокуоннарын туһанан лимонтан, апельсинтан, яблокаттан,  хортуопуйтан,  туустаах оҕурсуттан уонна помидортан батарейка оҥорон таһаардылар. Саамай элбэх уот биэрэр күүһү лимон уонна туустаах огурсу көрдөрдүлэр. Батарейкалара үлэлиирин лаампанан бэрэбиэркэлээтилэр (светодиоднай лампа умайа түстэ). Онтон «хайа бөлөх түргэнник уот ылар эбитий?” диэн күрэххэ Альберт бөлөҕө бастаата. Бастакы бөлөх аҕыйах сөкүүндэнэн  хойутаатылар. Оҕолор бары интэриэһиргээн көхтөөхтүк  үөрэ-көтө кытыннылар. Өссө олоххо туттуохха сөп эбит диэн санааларын үллэһиннилэр.  

Бу уруокка оҕолор  физика сокуоннара мээнэҕэ суруллубатахтарын ил харахтарынан көрөн, тутан-хабан билиилэригэр билии эбиннилэр, саҥа сыалы-соругу туруорунан иннин диэки хардыылаатылар.

Суруйда: Ороссолуода орто оскуолатыгар

физика учуутала Иванова А.А.