Ороссолуодаҕа байыаннай-спортивнай сбор

Олунньу  10-11 күннэригэр 5-11 кылаас үөрэнээччилэригэр байыаннай сбор Ороссолуода орто оскуолатыгар 3 сылын ыытылынна,  бу бырайыагы Оскуолабыт физкультура5а учуутала уонна байыаннай сбор салайаачччыта Филиппов П.М. олоххо киллэрбитэ. Быйылгы үөрэх дьылыгар саҥа уларыйыы киллэрэн  Павловскай, Хаптаҕай, Ороссолуода орто оскуолалара кыттыыны ыллылар,  барыта 42 уол, байыаннай бэлэмнэнии араас көрүҥнэригэр дьарыктаннылар уонна үөрэннилэр. Бу тэрээһини иилээн-саҕалаан ыытааччыларынан байыаннай бэлэмнэнии салайааччылара Филиппов П.М., Зыков П.И., Попов А.А. буоллулар.

Ол курдук, уолаттар бастакы  күн 3 ротаҕа арахсан, хапытааннарын талан, бу курдук дьарыктарынан сырыттылар:

-         Инстанцияларынан дьарыктар, онно киирэр, байыаннай хаамыы көрүүтэ, бириэмэҕэ автомат ыһыы, хомуйуу, бириэмэҕэ ОЗК таҥаһы кэтии уонна байыаннай-патриотическай иитиигэ аналлаах история уруога.

-          Уолаттар күүстэрин бэрэбиэркэлиир тардыныы күрэҕэ.

-         Сэрии тиэмэтигэр киинэ көрүү, ырытыһыы.

Биир тэрээһининэн  Чечня уонна Афганистан сэриилэрин  кыттыылаахтара Шарин В.В., Семенов Н.М. кэлэн ыалдьыттаабыттара буолла. Оҕолор бары интэриэһиргээн, чуумпуран олорон иһиттилэр, көрдүлэр, сэргээтилэр.

Иккис күн уолаттар байыаннай хаамыыга дьарыктаннылар, сыал ытыытыгар күрэхтэстилэр уонна киэһээҥҥи эҕэрдэ кэнсиэрдэригэр роталарынан арахсан бэлэмнэннилэр.

Түмүктүүр күҥҥэ, уолаттар хамаандаларынан бэйэ-бэйэлэригэр  эҕэрдэ кэнсиэр көрдөрдүлэр, уолаттар үчүгэй спортивнай көрдөрүүлээх эрэ буолбакка, ырыаҕа, үҥкүүгэ, көрдөөх-нардаах нүөмэрдэргэ талааннарын арыйан сэргэх кэнсиэринэн “ура” хаһыытынан байыаннай-споривнай сбордарын түмүктээтилэр.

Бу икки күн устата уолаттар астарыгар – үөллэригэр тиийэ дьиҥнэх аармыйа олоҕун кытта билистилэр. Хас биирдии үөрэнээччигэ олус туһалаах, элбэх билиини – көрүүнү биэрэр, умнуллубат тэрээһин ыытылынна.

Суруйда: Ороссолуода орто оскуолатын

төрүт кульура учуутала

Бочкарева Анастасия