Оскуолабыт үүнэ-сайда тур!
Оскуолабыт үүнэ-сайда тур!
Мэҥэ-Хаҥалас улууһун Ороссолуода орто оскуолата 1999 сылтан агрохайысханан дьарыктанан, күн бүгүҥҥэ диэри үлэлии-хамсыы олорор. 1874 сылтан саҕалаан дириҥ, киэҥ историялаах, үлэни-үөрэҕи өрө туппут оскуолабыт, 2019 сылга агрохайысханан дьарыктаммыта 20, тэриллибитэ 145 сыллаах үбүлүөйэ үрдүҥ таһымнаахтык буолан ааста.
Муус устар 6 күнүгэр биһиги тапталлаах оскуолабыт 145 сыллаах үбүлүөйэ буолла.
Ороссолуода орто оскуолата Мэҥэ-Хаҥалас улууһун биир кырдьаҕас оскуолатынан буолар. Биһиги оскуолабытын 1874 сыллаахха Герасим Иванович Соловьев туруорсан төрүттээбитэ. Ону таһынан оскуолабыт, агрохайысхалаах буолбута быйыл 20 сылын туолла.
Үбүлүөй күн олус элбэх ыҥырыылаах ыалдьыттар, бэтэрээн учууталлар, выпускниктар, Мэҥэ-Хаҥалас улууһун оскуолаларын дириэктэрдэрэ кэлэн ыалдьыттаатылар.
Бу күн бары кылаастар кэлбит ыалдьыттарга кылаас чаастарын ыыттыбыт. Ааспыт кэмнэри санатар таайбараҥнары, истиҥ кэпсэтиини, викториналары, оонньуу уруоктары тэрийдибит уонна кылаас чаас түмүгэр ыалдьыттарбытыгар бэйэбит оҥорбут бэлэхтэрбитин туттардыбыт. Выпускниктар кылаас чаастарыгар киирэннэр оскуола саҕанааҕы кэмнэрин санаан, ахтан, кэпсэтэн дуоһуйа астынан тарҕастылар.
Кылаас чаастарын таһынан оскуола үөрэнээччилэрэ уонна учууталлара эҕэрдэ кэнсиэр көрдөрдүбүт.
Кэнсиэрбитигэр араас саҥаттан-саҥа нүөмэрдэр көһүннүлэр. “Тэтим” үҥкүү ансаамбылын кыргыттара ийэлэрин кытта, Герасим Соловьев ырыатын доҕуһуолугар, “Сардаана” үҥкүүтүн көрдөрөн сөхтөрдүлэр. Ону таһынан, 26 оҕо кыттыылаах “Алгыс” үҥкүүтэ дьон биһирэбилин ылыаҕын ылла. Араас конкурстар кыайыылаахтара “Силиги симэхтэрэ”, ВИА уолаттар ансаамбыллара бырааһынньыктааҕы күнү өссө киэргэтэн, тупсардылар. Кэнсиэр быыһыгар күндү выпускниктарбыт тапталлаах оскуолаларыгар, учууталларыгар эҕэрдэ тылларын эттилэр, махталларын биллэрдилэр. Онон бу киэһээ, олус үчүгэйдик ааста.
Суруйдулар: Попова Нарыйаана, Яковлева Яна
5 кылаас үөрэнээччилэрэ
